Misaka ang gidaghanon sa electric-powered vehicles (EVs) sa Central Visayas sulod sa milabayng tulo ka tuig, sumala sa datos gikan sa Land Transportation Office (LTO).
Gikan sa ubos sa 500 ka EVs niadtong miaging mga tuig, misaka kini sa 500%. Sa 2025, dul-an na sa 3,000 ka electric-powered vehicles, lakip ang hybrid ug battery-operated, ang narehistro sa rehiyon.
Bisan pa niini, nagpabiling ubos ang adoption rate nga wala pa moabot og usa ka porsyento, tungod kay dominante gihapon sa kadalanan ang mga sakyanang naggamit og gasolina ug diesel.
Sa maong report, giapil ang hybrid vehicles isip kabahin sa mas lapad nga kategorya sa “electric-powered,” bisan pa man nga dili kini tan-awon sa ubang eksperto nga “tinuod” nga EVs.
Misaka usab ang rehistrasyon sa battery-operated vehicles (BEVs) gikan sa 105 sa 2024 ngadto sa 822 sa 2025. Sa unang duha ka bulan sa 2026, nakarekord og dugang 208 ka unit ang LTO. Ang hybrid vehicles mitaas usab gikan sa 521 ka rehistrasyon duha ka tuig ang milabay ngadto sa 1,801 sa 2025.
Sa Enero hangtod Pebrero karong tuiga, anaa na sa 558 ka hybrid cars ang narehistro, labaw pa kini kun itandi sa 2024. Sa kinatibuk-an, misaka og 559% ang electric-powered vehicles sa rehiyon gikan 2023 hangtod 2025, nga nagpakita sa paspas nga pag-uswag sa interes sa mga konsumidor.
Gipasabot usab nga ang kasagarang gilay-on sa biyahe sa Metro Cebu mosulod ra sa kapasidad sa modernong EVs nga makadaganan og 300 hangtod 500 kilometro sa usa ka charge. Bisan sa pagtaas sa numero, mikabat gihapon sa ubos sa usa ka porsyento ang EVs sa kinatibuk-ang sakyanan sa rehiyon.
