Arestado ang usa ka babaye kinsa wanted sa kasong Simple Theft pinaagi sa gilusad nga law enforcement operation sa kapulisan sa Purok Isla Verde, Brgy. Santo Niño, Polanco, Zamboanga del Norte niadtong Marso 26, 2026. Giila ang dinakpan nga si alias Weng, 48-anyos, minyo ug residente sa maong dapit.
Gisikop ang akusado pinasikad sa warrant of arrest sa nasangpit nga kaso nga gipagula ni Rolando How, Presiding Judge, Regional Trial Court, National Capital Judicial Region, Branch 257, Parañaque City, pinetsahan og Enero 3, 2018.
Adunay girekomendar nga pyansa ang korte nga nagkantidad ug Php40,000.00 alang sa iyang temporaryong kagawasan.
Gilusad pinaagi sa mga personahe sa tracker team sa Polanco Municipal Police Station ang maong operasyon. Samtang gidala ngadto sa kustodiya sa kapulisan ang akusado alang sa tukmang disposisyon.
Photo Courtesy: Polanco MPS
