Nagpakita og talento ug kusog ang mga babayeng personnel sa Bureau of Jail Management and Penology (BJMP) atol sa Modern Ethnic Dance Competition nga gihimo sa Davao del Sur Coliseum kagahapong adlawa, isip kabahin sa selebrasyon sa Women’s Month.
Lakip sa maong kompetisyon ang mga miyembro gikan sa Digos City District Jail – Male Dormitory (DCDJ-MD), Female Dormitory (DCDJ-FD), ug Davao Occidental District Jail.
Gipahigayon ang kalihokan pinaagi sa imbitasyon sa Office of the Governor aron ipakita ang abilidad, kaisog, ug kultura sa mga kababayen-an sa probinsya.
Nagkatigom sa kompetisyon ang nagkalain-laing partisipante gikan sa mga ahensya sa gobyerno, diin gipakita dili lamang ang talento kondili usab ang panaghiusa ug pagpalig-on sa kababayen-an sa serbisyo publiko.
Sa ilang pasundayag, gipakita sa BJMP female personnel ang kahapsay, disiplina, ug panagtinabangay pinaagi sa usa ka makapadani nga sayaw nga naghiusa sa modernong lihok ug tradisyonal nga inspirasyon gikan sa lokal nga kultura.
Sumala sa BJMP, ang ilang partisipasyon nagpakita sa ilang dedikasyon sa holistic nga paglambo sa ilang mga miyembro—dili lamang sa propesyonal nga serbisyo, kondili usab sa pagpalambo sa kahibalo sa kultura ug paghatag gahum sa kababayen-an.
Kabahin kini sa nasudnong pagsaulog sa Women’s Month nga naghatag pag-ila sa dakong kontribusyon sa kababayen-an sa pagtukod sa nasud ug kalamboan sa komunidad.
Padayon usab ang BJMP sa pagsuporta sa mga kalihokan nga nagpalig-on sa panaghigalaay, nagdasig sa pagkahiusa, ug nagpasidungog sa kalain-lain ug inklusibong kultura sulod sa organisasyon.
