Paagion na ang mga jeepney apil ang traditional ug modernized sa dalan nga gigamit sa Bus Rapid Transit (BRT) sa dakbayan sa Sugbu, ilabina sa mga rutang susama og agianan.
Ang maong lakang gitogutan sa Department of Transportation ug ipatuman sa Cebu City Transportation Office ubos sa pagpangulo ni Raquel Arce.
Matod ni Arce nga Dili na mahimong bisan asa magpasakay ug magpakanaog og mga pasahero. Sama sa BRT bus, ang mga jeepney obligado na nga mohunong lang sa terminal ug bus stations.
Gilauman nga makatabang kini sa pagluag sa trapiko, labi na sa outermost lanes sa kadalanan panahon sa rush hour. Apan, nasuta na nga posibleng dili dayon kini dawaton sa tanang pasahero, ilabina kadtong nagdali, tungod sa panginahanglan nga molakaw paingon sa mga terminal.
Bisan pa niini, gipasidaan sa CCTO nga dili magdugay ang pagpatuman sa balaod. Magsugod na nga dakpon ang mga drayber nga mosupak sa maong lakang ilabina kadtong magpadayon sa paghunong gawas sa opisyal nga dapit diin tugotan nga makasakay ug makahunong.
Dugang ni Arce, susama ra ang sistema sa jeep ug BRT nga gitawag og terminal-based na ang sakay ug pagnaog sa mga pasahero.
