Balik prisohan ang usa ka High-Value Individual o HVI human kini masikop sa buy-bust operation nga gihimo sa kapulisan sa Digos City.
Nasayran nga ang suspetsado nga giila nga si alyas “Meg,” 40-anyos ug residente sa Barangay Aplaya, nadakpan pasado alas dose sa tungang gabii, Marso 17, sa Luna Street, Barangay Zone 3, Digos City.
Gipahigayon ang operasyon sa City Drug Enforcement Unit o CDEU sa Digos Police Station, diin narekober gikan sa suspek ang kapin 20 gramos nga gidudahang shabu nga adunay gibanabanang kantidad nga molapas sa ₱140,000.
Base sa imbestigasyon, giila ang suspek isip High-Value Individual ug ginadudahang nalambigit sa pagbaligya og ilegal nga droga sa Digos City ug sa silingang mga lungsod sama sa Hagonoy ug Padada, Davao del Sur.
Dugang pa sa kapulisan, dili na bag-o ang suspek sa ilegal nga kalihokan tungod kay kaniadto na kining napriso sa kaso nga may kalabutan sa droga.
Sa pagkakaron, anaa na sa kustodiya sa Digos Police ang suspek samtang giandam ang kasong paglapas sa Republic Act 9165 o Comprehensive Dangerous Drugs Act of 2002.
