Gidayeg sa National Bureau of Investigation (NBI) Pagadian District Office ang proctor nga nakasakop sa impersonator sa gipahigayong Licensure Examination for Teachers (LET) nga gipahigayon sa usa sa mga tulunghaan sa syudad sa Pagadian, niadtong adlaw’ng Dominggo, Marso 15,2026.
Matod pa ni Atty. Paul Dosdos, Head Agent sa NBI Pagadian, ang proctor ang mismong nakasakop nga lahi ang identity sa actual nga examinee kumpara sa tinuod nga nakarehistro alang sa Licensure Examination for Teachers kon LET.
Hinungdan, gilayon kining gi-report ngadto sa mga ahente sa NBI nga nag-roving sa lugar nga maoy hinungdan sa pagkasakop sa indibidwal.
Gisaysay ni Atty. Dosdos, ang maong panghitabo ma-konsiderar nga collective effort tali sa NBI Pagadian ug Professional Regulations Commission (PRC) Region 9 aron sa pagsiguro nga maayo ang pagkadumala sa pagpahigayon sa exam sa rehiyon 9.
Una nang giingon ni Atty. Dosdos, nga ang suspek mahimong mag-atubang og perpetual disqualification sa pagkuha og board examination, gawas pa sa posibleng kaso nga ipasaka batok kaniya tungod sa pagpangilad ug paglapas sa balaod.
