Giklaro sa National Commission of Senior Citizens (NCSC) Region 9 nga dili malikayan ang presensya sa pipila ka mga politiko sa panahon sa cash gift distribution alang sa mga senior citizen, bisan pa adunay mga panawagan ang DILG nga likayan ang “epal” nga politiko sa kalihokan sa cash distribution.
Sa interview sa Juander Radyo News Team kang Regional Director Fernando Sumongdong, giklaro niya nga ang cash gift program usa ka benepisyo nga gitagana sa national government alang sa mga edaran ubos sa Republic Act No. 11982 o ang Expanded Centenarians Act nga naghatag og cash gift sa mga kwalipikadong senior citizen.
Giingon niini, nga part sa ilang “sort of courtesy” moduol gyud sila sa Local Government Unit, pinaagi sa MSWDO ug OSCA office aron pag-ila sa mga benepisyaryong senior citizen.
Gipasabot ni Director Sumongdong, nga ang ilang tumong mao nga mahatag ang benepisyo sa mga senior citizen sa husto ug episyenteng paagi ug giingon nga ang presensya sa mga politiko usahay dili malikayan ilabi na kung sila mga lokal nga opisyal sa lugar.
Segon sa opisyal, nga base sa kasinatian sa milabay nga pag-release sa cash gifts alang sa Octogenarian, Nonagenarian ug Centenarian, wala’y mga politiko nga mihimo og pag-angkon sa programa sa national government.
Photo Courtesy: NCSC REGION IX
