Nagpahigayon og ceremonial turnover ang Local Government Unit (LGU) sa Nabunturan, Davao De Oro nakalabayng adlaw sa mga canopy alang sa mga vendors sa night market nga nahimutang duol sa NCCC area, isip kabahin sa programa nga gipahigayon uban sa Department of Labor and Employment (DOLE).
Sumala ni Vice Mayor Cyrian Ayco Reterba sa pag-interviews sa Juander Radyo News Team, gihimo ang turnover sa covered court sa munisipyo aron itunol ngadto sa 35 ka benepisyaryo nga mga vendors ang mga bag-ong canopy nga ilang gamiton sa ilang mga pwesto sa night market.
Matod ni VM Reterba nga mapasalamaton ang LGU sa maong proyekto tungod kay dako kini og tabang sa mga vendors nga nagapanginabuhi sa night market.
Dugang pa niya, pinaagi sa maong proyekto, mahimong parehas ug mas organisado ang hitsura sa mga pwesto sa mga vendors, tungod kay uniform na ang ilang mga canopy nga makita sa night market.
Nagpahimangno sab ang opisyal sa mga vendors nga makadawat sa canopy nga ampingan pag-ayo ang maong proyekto tungod kay talagsaon kini nga oportunidad.
Dugang pa niini, nga nag-atubang karon og hagit ang mga negosyante tungod sa pagsaka sa presyo sa mga palaliton, ilabina sa krudo ug gasolina nga naapektuhan sa gyera sa Middle East, busa gihangyo niya ang tanan nga magpailob tungod kay kini usa ka global nga problema.
Kabahin ang programa sa paningkamot sa LGU sa pagpalambo sa kahimtang sa mga gagmayng negosyante ug sa paghatag og mas maayong lugar alang sa ilang pagpanginabuhi.
