Nag-andam na og Memorandum of Agreement (MOA) ang Provincial Government sa Zamboanga del Sur uban sa National Food Authority aron ipatuman ang Palay Marketing Assistance Program for Legislators and Local Government Units (PALLGU) sa probinsya.
Matod ni Provincial Agriculturists Dante Lao-ay, ang pag-draft sa MOA usa ka lakang aron mas mapalig-on ang kooperasyon tali sa lokal nga gobyerno ug sa NFA sa pagpalit sa humay gikan sa mga mag-uuma sa probinsya.
Pinaagi sa maong programa, ang mga mag-uuma nga rehistrado sa RSBSA ug nagbaligya sa ilang humay sa NFA Zamboanga del Sur basi sa ilang buying price matag kilo makadawat ug dugang Php2 matag kilo sa nabaligya nilang humay gikan sa PLGU Zamboanga del Sur isip subsidiya alang sa mga mag-uuma nga nagtikad dili molapas 1 ka ektarya.
Kini gihimo aron mapataas ang kita sa mga mag-uuma ug malikayan ang pagbaligya sa mas ubos nga presyo ngadto sa mga traders.
Malaumon si Lao-ay pinaagi sa maong kasabutan, mas daghang mag-uuma sa Zamboanga del Sur ang makabenepisyo, samtang makatabang usab kini sa pagpalig-on sa suplay sa bugas sa probinsya.
Sa pagkakaron, gipaabot nalang nga pirmahan na sa PLGU ug sa NFA ang MOA aron opisyal nga masugdan ang implementasyon sa PALLGU program sa probinsya sa tuig 2026.
