Nabulabog ang 2026 Camel Beauty Show Festival sa Oman human nadiskobrehan sa mga beterinaryo nga adunay pipila ka Camel nga giapil sa kompetisyon nga gipailalom sa cosmetic enhancements aron monindot ang ilang dagway.
Sumala sa mga opisyal, mokabat sa 20 ka kamelyo ang gilayong wala pa-apila sa kompetisyon human mapamatud-an nga gi-injectan kini og Botox ug lip fillers, aron mahimong mas pouty, nindot tan-awon ang ilang mga ngabil. Nadiskobrehan usab sa imbestigasyon ang paggamit og silicone implants aron mausab ang porma sa ilong sa mga Camel, ug hormone injections aron padak-on ang ilang mga kaunuran.
Ang Camel Beauty Contest giila nga usa ka seryoso ngakalingawan sa Oman tungod sa dako nga premyo, ug sa taas nga presyo sa pagbaligya sa mga mananaog nga lahi sa Camel. Tungod niini, adunay ubang breeder nga matintal sa pagpanglimbong pinaagi sa paggamit sa gidili nga mga pamaagi aron makadaog sa titulo nga “pinakagwapa nga kamelyo.”
Nagpasidaan ang mga eksperto nga ang paggamit sa cosmetic procedures sa mga hayop mahimong makadaot sa ilang kahimsog. Matod pa nila, ang mga filler mahimong hinungdan sa grabe nga impeksyon, samtang ang Botox makapugong sa normal nga pag-usap ug pag-inom sa Camel, nga mahimong mosangpot sa seryosong problema sa ilang panglawas.
Photo Courtesy: Grazia
