Nagpagawas na sa iyang gibati ang aktres ug TV host nga si Anne Curtis sa kontrobersiya kalabot sa paghisgot ni Quezon City 4th District Representative Bong Suntay sa iyang ngalan sa giingong sekswal ug malaw-ay nga “analogy” atol sa pagdungog sa House of Representatives.
Sa iyang Instagram statement, si Curtis niingon nga nagpakahilom lang siya kay gusto niya nga makauban ang iyang pamilya nga nastranded sa Middle East.
Apan karon nga nibalik na siya sa Pilipinas, nipagawas kini saiyahang gibati, dili alang sa pagpanimalos o drama, tungod kay sayop ang pagpakahilom alang kaniya ug sa tanang babaye nga nakasinati niini nga sitwasyon.
Gikondenar usab sa aktres ang pamahayag sa kongresista ug gitawag kini nga “bulgar and sexualized,” ilabi na kay gigamit ang iyang pangalan nga walay pagtugot ug walay respeto.
Subay niini giangkon niya nga nasakitan siya, nabalaka ug nasuko sa paagi sa pagtratar kaniya. Matod pa sa aktres nga dili talagsaon ang maong kasinatian tungod kay daghang mga babaye ang makasinati og mga komentaryo sa sekso kada adlaw, apan mas makatugaw kay gikan kini sa usa ka opisyal sa gobyerno.
Photo Courtesy: PEP.ph
