Dili makadula ang tulo ka players sa Solid South All-Stars sa umaabot nga PBA Season 50 All-Star Game nga ipahigayon karong Domingo sa Candon City Arena sa Ilocos Sur. Tungod niini, siyam na lamang ka players ang mahibilin sa lineup sa koponan nga pamunuan ni Coach Chot Reyes.
Ang mga players nga dili makadula mao sila Scottie Thompson, Roger Pogoy, ug Jericho Cruz. Sumala sa Willie Marcial, wala pa gitugotan sa doktor sila Thompson ug Cruz nga makadula tungod sa ilang mga injury, samtang si Pogoy mibalik sa Cebu tungod sa personal nga rason.
Gibutyag usab sa PBA nga wala na sila makapangita og ikapuli sa tulo ka players tungod kay duol na kaayo ang dula. Kinahanglan pa unta og bag-ong uniform ang mga ilisan nga players ug dili na kini maabtan sa oras sa All-Star Game.
Bisan kulang sa players, moduwa gihapon ang Solid South batok sa Solid North nga adunay 12 ka players. Kahibaloan nga ang Team North adunay lima ka sunod-sunod nga kadaogan batok sa Team South sa miaging mga All-Star Game sa liga.
Photo Courtesy: PBA
