Nadakpan ug anaa na karon sa kustodiya sa mga awtoridad ang usa ka tricycle driver human kini misulay og ikyas ang drayber og naguyod ang traffic enforcer udto, niadtong Marso 5, 2026, sa dakbayan sa General Santos.
Sumala sa report, gipahunong sa usa ka traffic enforcer ang maong driver tungod sa paglapas sa balaod sa trapiko. Apan imbes nga mokooperar o mopirma sa citation ticket, kalit kining mipadagan sa iyang tricycle hinungdan nga naguyod ang enforcer sa sementadong dalan samtang nagdagan ang tricycle.
Pinaagi sa hiniusang pwersa sa Public Safety Office – City Transport and Traffic Management Division o PSO-CTTMU, dali nga natultolan ang nahimutangan sa driver sa iyang pinuy-anan sa Brgy. Calumpang, Gensan pinaagi sa mga footage nga nakuha gikan sa CCTV sa lugar.
Gidala ang driver ug ang iyang tricycle ngadto sa buhatan sa PSO diin pormal kining gitugyan sa PNP Traffic Enforcement Unit o PNP-TEU alang sa pagpasaka og tukmang kaso ug kaukulang disposisyon.
Samtang ang biktima nga traffic enforcer gipaubos dayon sa medical examination aron masiguro ang iyang kahimtang human sa maong insidente.
