Gipahibalo sa Department of Agriculture (DA) nga makadawat og tabang nga nagkantidad og PHP100 milyon ang mga mag-uuma ug mangingisda sa nasud isip fuel subsidy, samtang naghulga ang pagsaka sa presyo sa lana tungod sa nagpadayon nga tensyon sa Middle East.
Matod sa DA, kini nga ayuda gitumong aron matabangan ang sektor sa agrikultura nga dili kaayo maapektuhan sa posibleng pagtaas sa presyo sa krudo.
Sumala sa tigpamaba sa DA nga si Assistant Secretary Arnel de Mesa, giaprubahan na sa Department of Budget and Management (DBM) ang pondo nga PHP150 milyon alang sa fuel subsidy program. Sa maong kantidad, PHP100 milyon na ang na-release ngadto sa DA ug andam na ipanghatag sa mga kwalipikadong benepisyaryo sa programa.
Sumala pa nga matag mag-uuma makadawat og PHP5,000 nga one-time fuel assistance samtang ang matag mangingisda makadawat og PHP3,000. Gilauman nga anaa sa 9,700 ka mag-uuma ug 15,800 ka mangingisda ang unang makabenepisyo sa ayuda.
Aron mahimong kwalipikado, kinahanglan nga rehistrado ang mga mag-uuma sa Registry System for Basic Sectors in Agriculture (RSBSA), samtang ang mga mangingisda kinahanglan usab rehistrado sa RSBSA o Municipal Fisherfolk Registration System ug adunay bangka nga dili molapas sa tulo ka gross tons.
Ang nahibilin nga PHP50 milyon ipagawas pa sa DBM kon moabot sa USD80 kada bariles ang presyo sa krudo sa kalibutan. Sa kinatibuk-an, gilauman nga mokabat sa 14,500 ka mag-uuma ug 23,800 ka mangingisda ang makabenepisyo sa fuel subsidy.
Ang ayuda idirekta nga ipasulod sa Interventions Monitoring Card (IMC) sa mga benepisyaryo, nga magamit nila sa pagpalit og gasolina sa mga gasolinahan, samtang voucher ang ihatag sa mga lugar nga adunay problema sa koneksyon.
Photo Courtesy : Inquirer.net
