Mihimo na usab og kasaysayan ang bida sa Los Angeles Lakers nga si Lebron James human niya nakabot ang record alang sa pinakadaghang field goals sa tibuok kasaysayan sa NBA niadtong Biyernes (oras sa Pilipinas). Gilabwan ni James ang kaniadtong record ni Kareem Abdul-Jabbar nga adunay 15,837 ka field goals.
Natala niya ang maong garbo pinaagi sa usa ka fadeaway jumper sa unang quarter sa ilang dula batok sa Denver Nuggets, bisan pa man sa kapildihan sa Lakers sa maong dula sa iskor nga 120-113.
Sa edad nga 41, si James anaa na sa iyang ika-23 nga season sa NBA—ang pinakataas nga career sa kasaysayan sa liga. Gawas sa bag-ong record, si James usab ang naghupot sa record sa pinakadaghang puntos nga miabot na og kapin 43,000 points, nga mas taas og halos 5,000 points itandi kang Abdul-Jabbar nga iyang nalabwan kaniadtong 2023.
Bisan pa sa mga hungihong sa pagretiro, gipahayag sa maong basketbolista nga wala pa siya’y klarong petsa kon kanus-a siya moundang sa pagdula ug nagpabiling dominante gihapon sa sulod sa korte.
Photo Courtesy: Olympics.com
