Patay ang driver sa XRM nga motorsiklo human nga mibangga sa Sports Utility Vehicle didto sa National Highway, Brgy. Galas, Dipolog City, Zamboanga Del Norte, Marso 3, 2026.
Sumala sa inisyal nga taho sa Dipolog City Police Station nga kusog ang dagan sa maong motorsiklo nga gimaneho sa 73-anyos nga lalaki, residente sa nasangpit nga barangay nga naggikan sa residential area paingon sa national Highway ug matod pa nawad-an sa control ang driver hinungdan nga diretso kining nibangga sa bao-bao ug milahos sa Isuzu Mu-X Sport Utility Vehicle (SUV) nga gimaneho sa 42-anyos nga lalaki ug taga Barangay Santa Filomena.
Tungod sa kakusog sa impak sa maong pagbangga, nakaangkon ug severe head injury ang driver sa motorsiklo ug gidali pagdala sa ospital apan gideklara kining dead on arrival.
Samtang ang bao-bao nga unang gibangga sa motorsiklo ang nahayang nga gimanaho sa 52- anyos nga lalaki, nga parehong taga Brgy. Galas ug swerte nga wala kini makaangkon og kadaot sa kalawasan.
Ang mga nalambigit nga mga sakyanan ang gidala sa Dipolog City Police Station alang sa tukmang dokumentasyon ug disposisyon samtang nagpadayon pa ang dugang imbestigasyon.
Photo Courtesy: Jemar Salvador Pala Channel
