Nagpabiling alerto ang Department of Social Welfare and Development (DSWD) Field Office Caraga Quick Response Team (QRT) ug nagpadayon sa hugot nga pagmonitor sa mga komunidad nga naapektuhan sa shear line sa rehiyon.
Base sa report sa Disaster Response Operations Monitoring and Information Center (DROMIC) alas-4:00 sa hapon, Pebrero 23, 2026, mikabat na sa 112,262 ka pamilya o 438,107 ka indibidwal ang naapektuhan.
Sa maong ihap, 1,596 ka pamilya o 5,953 ka persona ang kasamtangang nagpabilin sulod sa mga evacuation centers. Gikan sa 271 ka evacuation centers nga giablihan, 47 niini (17.34%) ang bukas pa hangtod karon. Samtang 6,224 ka pamilya o 25,995 ka persona ang nagpuyo sa temporaryong dangpanan gawas sa evacuation centers.
Aron masuportahan ang mga apektadong komunidad, nakahatag na ang DSWD Caraga og 55,442 ka Family Food Packs (FFPs) nga gipang-apod-apod sa mga lungsod sa Bunawan, San Luis, Veruela, Prosperidad, ug Sta. Josefa sa Agusan del Sur, lakip ang Bislig City sa Surigao del Sur.
Nagpadayon ang DSWD Field Office Caraga sa hugot nga koordinasyon sa mga lokal nga panggamhanan nga nangayo og augmentation support aron masiguro ang dali ug episyenteng paghatod sa tabang.
Photo courtesy: DSWD CARAGA
