Padayon naningkamot ang buhatan sa Department of Education (DEPED) Region IX sa pagtudlo sa mga kabataan sa rehiyon nga mahimong responsable ug disiplinado sa paggamit sa digital technology.
Matod ni DEPED 9 Assistant Regional Director Dr. Gregorio Cyrus Elejorde, usa sa tutukan sa ilang buhatan ang pagtudlo sa mga magtutungha sa responsableng paggamit sa teknolohiya sama sa nauso nga AI o Artificial Intelligence.
Dugang ni ARD Elejorde, padayon ang ilang mga programa ug kampanya nga nagtutok sa husto nga paggamit sa internet, social media, ug uban pang online platforms aron malikayan ang cyberbullying, ug online scams.
Gipasiugda usab niya ang kamahinungdanon sa digital literacy diin gitudloan ang mga estudyante unsaon pag-ila sa tinuod ug peke nga mga impormasyon ug pagpanalipod sa ilang personal data.
Gawas niini, gipalig-on matod pa sa ilang buhatan ang ilang pakigtambayayong ngadto sa mga ginikanan ug komunidad aron magtinabangay sa paggiya sa mga kabataan sa responsableng paggamit sa mga gadgets.
Giingon ni ARD Elejorde kabahin sa mas lapad nga tumong sa DepEd 9 karon ang pagsiguro nga ang teknolohiya mahimong instrumento sa pagkat-on ug dili hinungdan sa kadaot sa mga tinun-an sa Zamboanga Peninsula Region.
Photo Courtesy:DEPED RO IX
