Swerting nakalingkawas ang duha ka mga bata human matabunan ang ilang panimalay sa landslide nga nahitabo niadtong nakalabay nga adalaw sa Sitio Sorex, Barangay Tambis, sa Barobo, Surigao del Sur.
Sumala sa inisyal nga taho, kalit nga nidahili ang yuta ug natabunan ang usa ka balay samtang natulog pa sa sulod ang duha ka menor de edad. Tungod niini, gilusad dayon sa mga responder ang dinaliang search and rescue operation aron maluwas ang mga biktima.
Una nga narekober sa mga otoridad ang 17-anyos nga si Allyssa Manabing Chua nga nakaangkon og mga samad, gituohang bali sa tiil, ug nakasinati og kalisod sa pagginhawa. Dali siyang gidala sa pinakaduol nga pasilidad medikal aron mahatagan og hustong pag-atiman.
Nasundan kini sa pagluwas sa 4-anyos nga si Athena Magsayo, nga nakaangkon lamang og gagmayng samad bisan pa sa kakuyaw sa nahitabong insidente.
Nagpabilin sa lugar ang mga ground responders aron padayon nga bantayan ang kahimtangan sa yuta ug masiguro nga wala nay laing peligro nga motumaw. Samtang nagpadayon usab ang pag-atiman sa mga batang nakalingkawas sa maong trahedya.
