Mipirma ang Bangko Sentral ng Pilipinas (BSP) og bulag nga information-sharing agreements uban sa mga nag-unang ahensya sa gobyerno aron palig-onon ang imbestigasyon batok sa nagkadaghang financial scams, nga nagtimaan sa laing lakang sa pagpatuman sa Anti-Financial Account Scamming Act (AFASA).
Ang mga kasabotan gipirmahan uban sa National Bureau of Investigation (NBI), Cybercrime Investigation and Coordinating Center (CICC), ug Securities and Exchange Commission (SEC). Tumong niini ang subay sa balaod nga pagpaambit sa kompidensyal nga impormasyon sa pinansyal nga mga account aron suportahan ang mga imbestigasyon nga naglambigit sa scam ug uban pang cyber-enabled fraud.
Nagrepresentar kang BSP Governor Eli Remolona Jr., gipormal ni BSP General Counsel Roberto Figueroa ang pagpirma sa mga kahikayan atol sa seremonyas nga gihimo sa hedkuwarter sa BSP sa Manila. Nag-uban kaniya sila si acting NBI director Angelito Magno, CICC executive director Renato Paraiso, ug SEC chairperson Francis Lim.
Sumala sa BSP, ang mga kasabotan nagtukod og tin-aw nga mga pamaagi sa paghangyo ug pagpasa sa impormasyon gikan sa Consumer Account Protection Office sa sentral nga bangko ngadto sa mga ahensya sa gobyerno, ilabi na sa mga kaso nga nalambigit sa gidudahang scam activities.
Gipasiugda sa BSP nga pinaagi sa mas lig-on nga koordinasyon sa nagkalain-laing ahensya, gilauman nga mas mapaspas ang pag-imbestiga ug pagdakop sa mga responsable sa financial fraud, samtang napalig-on ang proteksyon sa mga konsyumer sa sektor sa panalapi.
Photo Courtesy:BSP
