Ginganlan nga “America’s Top Young Scientist” ang 14-anyos nga si Heman Bekele human siya nakahimo og usa ka barato nga sabon nga posibleng makatabang sa pagtambal sa kanser sa panit.
Ang maong sabon adunay espesyal nga compound nga gitawag og SITC (Skin Cancer Treating Soap), nga gilaraw aron magpa aktibo pag-usab sa dendritic cells —mga selula sa immune system nga responsable sa pag-ila ug pag atake sa mga cancer cells, ilabi na ang melanoma, usa sa labing agresibo nga matang sa skin cancer.
Sumala sa gipagawas nga impormasyon, ang usa ka piraso sa sabon nagkantidad lamang og $0.50 aron mahimo. Dako kini nga kalainan kumpara sa tradisyonal nga mga pamaagi sa pagtambal sa skin cancer nga kasagaran moabot og napulo ka libo ka dolyar, depende sa kahimtang sa pasyente ug klase sa terapiya.
Ang inobasyon ni Bekele giila tungod sa potensyal niini nga mahimong accessible ug mas barato nga alternatibo sa kasamtangang mga pagtambal. Gilauman nga moagi kini sa hugot nga clinical trials sa mosunod nga mga tuig aron masuta ang kaluwasan ug kaepektibo niini.
Kung mapamatud-an nga luwas ug epektibo, posible nga magamit sa publiko ang maong produkto pagsapit sa 2028.
Ang kalampusan ni Bekele nagpakita sa dakong papel sa kabatan-onan sa pagdala og bag-ong ideya ug inobasyon sa siyensya ug medisina — usa ka pahinumdom nga bisan sa batan-ong edad, ang dedikasyon ug pagkamamugnaon mahimong makatampo sa pagluwas og kinabuhi.
Photo Courtesy: MECHANICAL ENGINEERING WORLD
