Gipahinumduman pag-usab sa Department of the Interior and Local Government (DILG) Davao de Oro ang hugot nga pagdili sa paggamit sa mga government-issue nga sakyanan alang sa personal nga katuyoan.
Sa interbyu sa Juander Radyo Nabunturan News Team kang Evan Noel C. Pascua, Local Government Operations Officer (LGOO) VII sa DILG Davao de Oro, iyang gipasabot nga klaro ang mandato nga ang mga sakyanan nga gipalit o gi-isyu gamit ang pondo sa gobyerno angay lamang gamiton alang sa opisyal nga mga buluhaton.
Sumala pa kaniya, ang paggamit sa maong mga sakyanan alang sa personal nga lakaw sama sa bakasyon, pagpamalit, o uban pang pribadong kalihokan usa ka paglapas sa gipatuman nga mga balaod, lagda, ug regulasyon. Gidugang niya nga mahimo lamang kini magamit kon ang lakaw may direktang kalabotan sa opisyal nga mga katungdanan ug gimbuhaton sa ahensya o lokal nga panggamhanan.
Sa katapusan, nanawagan ang DILG sa tanang lokal nga opisyal ug mga empleyado sa gobyerno nga magpakita og integridad, responsibilidad, ug pagkamabinantayon sa paggamit sa kabtangan sa gobyerno.
Matod sa ahensya, ang husto nga paggamit sa mga butang sa gobyerno kabahin sa pagpalig-on sa pagsalig sa katawhan ngadto sa serbisyo publiko ug maayong panggamhanan.
