Sa kabaryohan sa South Korea, nakakaplag og talagsaong solusyon ang pipila ka eskwelahan aron malikayan ang pagsira—ang pagdawat og mga estudyanteng lola.
Tungod sa padayon nga pagkunhod sa birth rate sa nasud, daghang classroom ang halos wala nay sulod nga kabataan. Busa ang mga eskwelahan sama sa Bangrim Primary School nag-abli sa ilang pultahan ngadto sa mga tigulang nga kababayen-an nga wala gyud nakakat-on pagbasa ug pagsulat sa ilang pagkabata.
Usa sa mga nakabenepisyo sa maong inisyatiba mao si Park Go-ee, 72-anyos, nga karon nagtuon uban sa mga gagmayng bata sulod sa parehas nga classroom. Alang kaniya ug sa uban pang senior citizen, ang pagbalik sa eskwelahan usa ka damgo nga karon pa lamang natuman.
Imbes nga magsira ang maong mga eskwelahan tungod sa kakulang sa enrollees, napadayon ang ilang operasyon pinaagi sa pagdawat sa mga tigulang nga determinado makab-ot ang edukasyon nga wala nila nakuha kaniadto.
Dako usab kini’g tabang sa mga senior citizen tungod kay nahatagan sila og ikaduhang higayon sa pag-eskwela, nagpalig-on sa ilang kumpiyansa ug mental well-being—ilabina sa usa ka nasud nga paspas nagkatigulang ang populasyon.
Samtang nagpadayon ang pagkunhod sa gidaghanon sa kabataan sa South Korea, gitan-aw sa mga edukador ang maong pamaagi isip praktikal ug makatawhanong lakang aron mapadayon ang operasyon sa mga eskwelahan ug sa samang higayon matabangan ang komunidad.
Photo Courtesy: TECH TIMES
