Hugot nga gipanghimakak nila ni Senador Christopher “Bong” Go ug kanhi Justice Secretary Vitaliano Aguirre II ang ilang mga ngalan nga nalakip sa usa ka dokumento nga gipagawas sa International Criminal Court (ICC) nga giingong nagngalan kanila nga “mga kauban sa krimen” sa usa ka kaso sa krimen batok sa katawhan nga may kalabutan sa kampanya batok sa ilegal nga droga sa administrasyon ni kanhi Presidente Rodrigo Duterte.
Sa usa ka pahayag, giinsistir ni Bong Go nga ang mga akusasyon batok kaniya walay basehan ug one sided. Miingon siya nga wala kini magpakita sa iyang tinuod nga mga katungdanan isip Special Assistant sa Presidente gikan sa 2016 hangtod 2018 ug Executive Assistant sa Mayor sa Davao City gikan sa 1998 hangtod 2016.
Gipasiugda sa senador nga wala siyay partisipasyon, kahibalo, o awtoridad sa giingong mga paglapas nga may kalabotan sa gubat batok sa droga. Gipanghimakak usab niya ang mga taho matod pa nagsilbi siya isip Chief sa Presidential Management Staff.
Samtang, gihimakak usab ni Vitaliano Aguirre II ang bisan unsang partisipasyon sa giingong extrajudicial killings nga gihimo ubos sa kampanya batok sa droga.
Sumala ni Aguirre, wala siya mosuporta ug wala’y nahibaloan sa giingong mga pagpatay. Miingon siya nga nahibal-an niya niadtong Septyembre 2025 nga ang iyang ngalan nalakip sa Document Containing Charges nga gisang-at sa prosekusyon niadtong Pebrero 13.
Sa pagkakaron, wala pay dugang detalye gikan sa ICC bahin sa sunod nga mga lakang sa kaso.
Photo Courtesy: MANILA STANDARD
