Gisugyot sa Nabunturan Municipal Police Station ang pagbutang og mga Closed-Circuit Television (CCTV) camera sa tanang establisyemento sa lungsod, isip kabahin sa pagpalig-on sa seguridad human sa pipila ka mga insidente nga natala sa nagkalain-laing lugar.
Sa pakighinabi sa Juander Radyo News Team, gipahayag ni PLTCOL Gomersendo L. Diwata II, Chief of Police sa Nabunturan MPS, nga ang maong inisyatiba, usa sa mga prayoridad nga programa sa kapulisan.
Matod niya, dako kini og ikatabang sa pagmonitor sa mga kalihokan ug sa dali nga pag-ila o pag-trace sa mga indibidwal nga posibleng nalambigit sa insidente. Dugang pa ni PLTCOL Diwata nga makakuha usab sila og mga detalye gikan sa mga CCTV camera nga gibutang sa MDRRMO aron mamonitor ang nagkalain-laing kadalanan sa lungsod.
Samtang nagpadayon ang pagpatuman sa mga balaod, gipasiugda sa kapulisan nga maghimo pa sila og dugang nga mga programa aron masiguro ang kalinaw ug kaluwasan sa tanang katawhan sa Nabunturan.
Photo Courtesy:
