Nagpasidaan ang Department of Foreign Affairs (DFA) sa mga Pilipino nga nangita og trabaho sa gawas sa nasud nga magbantay batok sa mga job offer nga posible nga naglakip og pagrekrut ngadto sa mga armadong pwersa sa laing nasud, bisan pa og kini gipakita nga ordinaryong sibilyan nga trabaho.
Sa advisory nga gipagawas, gipasiugda sa DFA nga ang pag-apil sa mga dayuhang panagbangi nagdala og seryosong peligro, lakip na ang grabeng kakuyaw sa kinabuhi ug legal nga mga sangputanan.
Subay sa advisory “Ang pagrekrut ngadto sa armadong pwersa sa laing nasud, direkta man o dili direkta, mahimong makalapas sa balaod sa Pilipinas ug mahimong hinungdan sa pagkawala sa pagkalumulupyo nga Pilipino.”
Sumala sa Commonwealth Act 63, ang pag-apil sa military, naval, o air service sa laing nasud nga walay pagtugot gikan sa gobyerno sa Pilipinas mahimong moresulta sa pagkawagtang sa Filipino citizenship.
Gidasig sa DFA ang mga Pilipino nga gustong motrabaho sa gawas nga siguruhon ug susihon pag-ayo ang mga job offer, recruitment agency, ug employer pinaagi sa Department of Migrant Workers (DMW).
Samtang gipasidan-an usab sila nga magmatngon batok sa ilegal o limbong nga recruitment nga mahimong magbutang sa ilang kinabuhi ug kahimtang sa peligro.
Ang maong pahimangno gipagawas human mikaylap sa social media ang video ni Raymond Gumangan gikan sa Alcala, Pangasinan. Sa video, iyang gisaysay nga gi-rekrut siya para sa logistics nga trabaho apan lahi ang iyang nahimong assignment pag-abot niya sa Russia.
Matud niya sa video nga siya karon naa sa usa ka detention camp sa Ukraine isip prisoner of war human siya madakpan. Ang Armed Forces of the Philippines (AFP) miingon nga nagtrabaho sila aron mapugngan ang limbong nga recruitment nga makabutang sa peligro sa mga Pilipino sa gawas sa nasud.
Photo Courtesy : Sky News
