Nagpahigayon og safety, security and assistance ang mga personahe sa Coast Guard Sub-Station Governor Generoso atol sa pag-ayo sa Cable Systems SEA-US West (Davao-BU) sa kadagatan sa Governor Generoso, Davao Oriental.
Ang maong lakang nagpakita sa padayon nga dedikasyon sa Philippine Coast Guard sa pagpanalipod sa kritikal nga maritime infrastructure ug pagsuporta sa mga importanteng operasyon sa kadagatan.
Gibantayan sa mga personahe ang cable ship nga Prima Nusantara atol sa operasyon sa pag-ayo sa optic fiber cable diin naguba tungod sa 7.6 magnitude nga linog nga miigo sa Davao Oriental niadtong Oktubre 10, 2025.
Samtang gitutokan usab nila ang kaluwasan sa barko, ingon man sa mga tripulante niini ug sa palibot nga kadagatan sa tibuok dagan sa operasyon. Gani, hugot ang ilang pagmonitor sa safety perimeter aron nga malikayan ug mapugngan ang mga kalihokan sa pagpangisda sa maong lugar ug malikay usab sa bisan unsang mga aksidente.
Gipaklaro usab nga ang maong lakang subay sa direktiba ni Presidente Ferdinand R. Marcos Jr. ug sa Department of Transportation Acting Secretary Giovanni Lopez nga ipasiugda ang transparency ug accountability sa Coast Guard Station Davao Oriental.
