Nagpabiling realidad nga giatubang sa tanang mga tulunghaan dili lang sa syudad sa Cagayan de Oro apan sa tibuok nasud ang kakuwang sa mga pasilidad, kagamitan ug mga classrooms nga dako ang epekto diha sa pagtuon sa mga estudyante.
Pananglitan nalang ang kahimtang sa Bulua National High School nga tungod sa kadako sa populasyon, nagapatuman sila og shifting sa klase aron lang maakumodar ang klase sa tanang estudyante. Ning kasamtangan, ang Junior High School palang daan mokabat na sa 2,911 ka estudyante. Kini nga gidaghanon, nagkinahanglan og 57 classrooms apan aduna lang 39 classrooms ang nahisgutang tulunghaan.
Gawas sa pagpatuman og shifting, mas gipamubo sab ang klase sa matag subject ngadto sa 40 minutos. Aminado si Engr. Macapangcat Mama Jr, Principal sa Bulua National High School nga tungod sa kakulangan ug sa ilahang kahimtang, ubos ang performance sa mga magtutungha.
Apan gipanaad sab ni Principal Mama nga paningkamutan nila mapalambo ang kalidad sa ilahang pagtudlo labi na nga bag-ohay lang, giturn-over kanila ang Php76.4 million nga state of the art school building nga gipunduhan sa Local School Board ning Dakbayan sa Cagayan de Oro.
Ang bag-ong building adunay upat ka andana ug disi sais ka smart classrooms kung asa kompleto kini sa mga modernong gamit sama sa smart tv, computer set, printer ug uban pa nga tabang aron nga mas makakat-on ang mga bata.
Isip chairman sa Local School Board, gihangyo sab ni Mayor Rolando Uy ang tanan nga ampingan kini nga pasilidad aron nga masunod pa sa ubang magtutungha ug giawhag ang mga estudyante nga pahimuslan kini nga bag-ong building.
