Opisyal nang gipirmahan niadtong Pebrero 9, 2026 sa Barangay Mangagoy Gymnasium ang Memorandum of Agreement (MOA) tali sa Barangay Mangagoy Council ug sa Department of Labor and Employment (DOLE) alang sa pagtukod sa Barangay Public Employment Service Office (BPESO).
Sumala sa mga opisyal, dakong lakang kini aron mas madala duol sa komunidad ang mga serbisyo sa panarbaho ug pang-empleyo para sa mga residente sa barangay.
Gitambongan ang kalihokan ni Bislig City Mayor Florencio C. Garay, nga girepresentahan ni Assistant City Administrator Jerson Coma, City Vice Mayor Atty. Conrad C. Cejoco, Barangay Captain Hon. Aaron E. Castillo, ug DOLE–Caraga Regional Director Atty. Jason P. Balais. Naa usab sa maong okasyon si Laine S. Elechicon sa PESO Bislig ug uban pang partner stakeholders, nga nagpakita sa lig-on nga panag-uban sa lokal ug nasyonal nga gobyerno.
Pinaagi sa maong panagtambayayong, target nga mahatagan ang mga Mangagoyanon og job matching, employment assistance, ug kasayuran sa labor market, aron mapalapdan ang oportunidad sa trabaho ug mapalig-on ang inklusibong kalamboan sa komunidad.
Padayon ang paningkamot sa pag-abli og dugang oportunidad alang sa mas lig-on ug mas mauswagon nga Barangay Mangagoy.
Photo courtesy: LGU Bislig
