Nag-anunsyo ang Department of Labor and Employment (DOLE) og pahibalo kalabot sa hustong sweldo sa mga empleyado nga mosulod sa trabaho sa Pebrero 17, 2026, nga giila isip usa ka espesyal nga adlaw nga walay trabaho tungod sa pagsaulog sa Chinese New Year.
Sumala sa labor advisory nga gipirmahan ni DOLE Secretary Bienvenido Laguesma, ang mga empleyado nga motrabaho sa maong adlaw bayran og dugang nga 30 porsyento sa ilang basic wage alang sa unang walo ka oras sa trabaho.
Kon molapas pa sa walo ka oras ang duty, adunay dugang nga 30 porsyento sa matag oras nga gitrabaho. Samtang, kung ang empleyado nga gikatakdang motrabaho sa iyang rest day ang mosulod sa maong petsa, bayran kini og dugang nga 50 porsyento sa unang walo ka oras, ug kon molapas pa, dugangan kini og 30 porsyento sa matag oras nga labaw sa walo ka oras.
Sa laing bahin, ang mga empleyado nga dili mosulod sa trabaho sa maong adlaw ipaubos sa no-work-no-pay policy.
Gipahinumdoman sa DOLE ang mga employers ug mga trabahante nga sundon ang maong pahibalo aron masiguro ang hustong bayad ug panalipod sa katungod sa mga mamumuo.
Photo courtesy : Serbisyo.ph
