Gigamitan sa kapulisan sa Australia og pepper spray ang mga raliyesta human nisangpot sa kagubot ang gipahigayon nga lihok-protesta batok sa pagbisita ni Israeli President Isaac Herzog sa maong nasud.
Gikatahong pipila ka mga protesters ang gipang-aresto sa mga awtoridad human sa nahitabong tensyon tali sa duha ka grupo. Anaa sa Australia si Herzog alang sa upat ka adlaw nga pagbisita aron kumustahon ang mga kabanay ug bisitahon ang mga lubong sa mga biktima sa pagpamusil sa Bondi Beach niadtong miaging mga bulan.
Giimbitahan ang presidente ni Australian Prime Minister Anthony Albanese sa tinguha nga mapalig-on ang panaghiusa ug kalinaw alang sa mga biktima nga kadaghanan mga Hudyo. Bisan pa sa gihimong pagpang-aresto, gipahayag sa mga protesters nga padayonon ug mas palapdan pa nila ang ilang lihok-protesta sa nagkalain-laing bahin sa Australia.
Photo Courtesy: Al Jazeera
