Gipahibalo sa City Environment and Natural Resources Office (CENRO) nga usa na karon ka dakong hagit alang sa mga taga-Malaybalay ang nagsingabot nga pagkapuno sa sanitary landfill sa dakbayan. Tungod niini, posibling gikinahanglan ang pag-upgrade o pagpalapad (expand) sa maong sanitary landfill aron adunay kabutangan sa mga “residual waste” sama sa mga sachet, diaper, ug cellophane nga dili na mahimong i-recycle.
Sa esklusibong pakighinabi sa Juander Radyo Malaybalay ngadto City ENRO head Jessie Suson sa nga, dunay 7.9 ka hektarya nga luna ang sanitary landfill nga adunay Environmental Compliance Certificate (ECC), apan 2 ka hektarya pa lamang ang kasamtangang nagamit. Buot ipasabot aduna pay nahabilin nga 5.9 ka hektarya nga mahimong gamiton sa pagpaluag aron masulbad ang problema sa kakuwang sa espasyo.
Dugang nga nini nga gawas sa pagpalapad sa luna, gisusi usab sa CENRO ang paggamit og mga “thermal decomposition facility”. Kini usa ka teknolohiya diin ang mga residual waste ibutang sa usa ka matang sa “oven” aron mahimong abo, apan gisiguro nga kini subay sa Clean Air Act ug standards sa DENR aron dili makapagawas og hugaw nga hangin.
Bisan pa man niini nga mga solusyon, hugot gihapon nga gihangyo ang kooperasyon sa mga residente nga limitahan ang pagmugna og basura. Gipahinumdoman ang tanan nga dili magpasulabi sa paglabay aron dili daling mapuno ang limitado nga espasyo sa landfill sa dakbayan.
Photo Courtesy: CENRO Malaybalay
