Gipahigayon sa lokal nga panggamhanan sa Kapalong ang coordination meeting uban sa mga stall owners nga nagnegosyo sulod sa Riverwalk Kapalong Stalls, diin gipangulohan sa Mayor sa lungsod niadtong nakalabay nga adlaw, sa Kapalong Riverwalk, Poblacion Maniki, Kapalong Davao del Norte.
Tumong matod pa ang panagtigom nga mapalig-on ang kooperasyon tali sa LGU ug sa mga negosyante aron masiguro ang hapsay, limpyo, ug luwas nga operasyon sa Riverwalk area, isip kabahin sa padayong programa sa lungsod alang sa kaayohan sa publiko ug paglambo sa lokal nga ekonomiya.
Lakip sa mga gihisgutan nga agenda mao ang general cleaning, pagtangtang sa roof extension, rehabilitasyon sa drainage, electrical works, pag-ayo sa flooring, road clearing, ug uban pang kabalaka sa mga negosyante.
Gipasiugda sa mayor ang kamahinungdanon sa panaghiusa ug disiplina sa pagmintinar sa kahapsay ug kalimpyo sa Riverwalk stalls, samtang giawhag niya ang mga tag-iya sa pwesto nga makigtinabangay sa LGU aron mas mapalambo pa ang pasilidad ug masiguro ang kaluwasan sa mga negosyante ug kustomer.
Padayon ang LGU Kapalong sa pagpatuman sa mga lakang nga maghatag og mas maayong kahimtang sa negosyo ug episyenteng serbisyo alang sa tanang Kapalongian.
Photo Courtesy : Kapalong Infocenter
