Gihangyo ang konseho sa dakbayan sa Cagayan de Oro nga magpahigayon og hinanali nga ocular inspection sa on-going nga konstruksyon alang sa expansion sa parking lot sa Gaisano Mall nga nahimutang sa Barangay 26, Cagayan de Oro City.
Kagahapong adlawa, atol sa regular nga session, sa special report ni Konsehal Marlo Tabac, iyang gipaabot ang hangyo ug petisyon sa mga residente sa Barangay 26 nga apektado sa nahisgutang konstruksyon. Saysay sa konsehal nakahatag kinig perwisyo sa mga residente sa lugar ug posibleng makompromiso ang panglawas sa mga residente.
Gawas sa kasaba, ang ginahimong embarkment nilapaw na sab sa gitas-on sa mga kabalayan, resulta sa pagbara sa mga mga drainage system sa lugar ug nakapahinabo og pagbaha sa nilabayng kusog nga pag-ulan nga dala sa Bagyong Basyang.
Giaksyunan na sa mga opisyales sa Barangay 26 kini nga rekalamo apan tungod sa implementasyon sa Ease of Doing Business Policy, nalimitahan ang barangay diha sa pagmonitor o pagcheck niini nga kontruksyon ug uban pang building works nga gikinahanglang ma-assess.
Gipadayag sab ni Konsehal Tabac ang iyang kabalaka ug gisugyot ang hinanaling ocular inspection sa lugar labi pa nga aduna na usab musunod nga bagyo sunod semana nga posibleng malunupan na sa tubig baha ang apektadong komunidad.
