Arestado na sa kapulisan ang usa ka house contractor nga nagpaulan og bala sa sakyanan sa usa ka magtiayon sa Sta. Cruz, Davao del Sur, human sa paspas nga hot pursuit operation sa mismong adlaw sa insidente.
Sumala sa report sa Davao del Sur Police Provincial Office pinaagi sa Sta. Cruz Municipal Police Station, nadakpan ang suspek nga si Roger Lamban Maningo, residente sa Barangay Zone 4, Sta. Cruz, sa dihang nagsakay kini sa usa ka Ford Ranger pick-up sa National Highway sa Barangay Darong, Sta. Cruz.
Ang mga biktima nga sila Arnel Cascolan Montero, 45-anyos, ug Villa Twinky Pabiona Montero, 52-anyos, parehong subcontractors sa Lazada ug residente sa Davao City, mipahibalo nga gipusil sila sa suspek samtang nagabyahe padulong sa Poblacion aron kuhaon ang ilang mga muwebles.
Sumala sa inisyal nga imbestigasyon, alas dos sa hapon niadtong Pebrero 7, 2026, samtang nagbyahe sila sa National Highway sa Barangay Astorga, duol sa Crossing Tubison, gipusil sa suspek nga nagsakay og motorsiklo og nagsul-ob og itom nga jacket.
Sa maong pagpamusil, usa ka .38 calibre nga armas ang gigamit sa suspek ug nakaangkon og upat ka igo ang sakyanan sa magtiayon—tulo sa atubangan ug usa sa tuo nga kilid. Usa usab ka Mitsubishi Mirage nga milabay sa lugar naigo sa saag nga bala, nga miresulta sa kadaot sa windshield niini.
Sumala sa investigator on case sa Sta. Cruz MPS nga si PMSG Frederick Lanario, miangkon ang suspek nga naa siyay kalagot sa magtiayon, ilabina kay wala siya nahiuyon sa mga terms and conditions sa gipatrabaho nga balay sa mga biktima.
Sa pagkakaron, anaa na ang suspek sa kustodiya sa kapulisan ug posible mag-atubang sa mga kasong Frustrated Murder ug Illegal Possession of Firearm. Gipaniguro sa DSPPO ngadto sa publiko nga padayon ang ilang paningkamot sa pas-pas nga pagpatuman sa balaod ug sa pagmintinar sa kalinaw ug kahapsay sa lalawigan.
