Gipasalig sa North Atlantic Treaty Organization (NATO) ang ilang walay puas nga suporta sa Ukraine human ang Russia nipahigayon og sunod-sunod nga pagpamomba gamit ang ballistic missiles ug drones nga miigo sa “energy sector” sa nasod.
Ang maong mga pag-atake, nga giisip nga usa sa pinakadako karong tuiga, nagbilin og grabeng kadaot sa mga power plants ug imprastraktura sa Kyiv ug uban pang dapit sa Ukraine, hinungdan sa pagkaputol sa kuryente taliwala sa grabe nga katugnaw.
Matod ni Ukraine President Volodymyr Zelensky, klaro nga mas gipili sa Russia ang “terror” ug pagpausbaw sa tensiyon kaysa sa diplomasya aron unta mahunong na ang gubat.
Nanawagan siya sa mga kaalyadong nasod nga dugangan pa ang pressure sa Russia aron mapugos kini sa paghunong sa ilang agresyon.
Si NATO Secretary General Mark Rutte, kinsa niduaw mismo sa Ukraine niining Pebrero 2026, personal nga nakigtagbo kang Zelensky ug sa mga miyembro sa parliament.
Sa iyang pagbisita, iyang gikondina ang mga pag-atake sa Russia ug gipasalig nga ang NATO mobarog uban sa Ukraine “sa pulong ug sa buhat” aron maseguro ang kaluwasan ug soberanya sa nasod.
Photo Courtesy:The Jamestown Foundation
