Gibuhat sa usa ka amahan sa China ang usa ka dili kasagaran nga paagi aron pugngan ang iyang anak sa sobra nga pagdula og online games human kini mihunong sa eskwela ug gisalikway ang mga oportunidad sa trabaho.
Gipadayag nga niadtong 2013, nabalaka na pag-ayo si Mr. Feng sa kahimtang sa iyang 23-anyos nga anak nga si Xiao Feng, nga miundang sa pag-eskwela, mibiya sa usa ka software internship, ug nagdumili sa mga job offer aron magpabilin sa halos tanang oras sa pagdula og online games.
Mihimo si Mr. Feng og talagsaong lakang pinaagi sa pagbayad og mga eksperyensyadong online gamers aron pirming targeton ug mapildi ang karakter sa iyang anak matag higayon nga molog-in kini sa dula, sa paglaum nga kapoyon ug mohawa na kini sa gaming.
Sulod sa pipila ka semana, halos dili na makadula si Xiao Feng kay pirmi na lang kini mapildi dayon sa game. Sa dihang iyang giatubang ang mga nag-atake sa iyang karakter, didto niya nahibaloan nga ang iyang kaugalingong amahan ang nagbayad kanila.
Bisan pa, wala makab-ot ang tumong sa amahan, tungod kay wala dayon naapektuhan ang desisyon sa anak. Matod pa ni Xiao Feng, mangita siya og trabaho kung andam na siya, ug nagpadayon gihapon sa pagdula og online games.
Napamatud-an sa maong panghitabo nga dili tanang talagsaong pamaagi epektibo sa pag-atubang sa problema sa sobra nga pagkaadik sa online games, ug nga ang komunikasyon ug pagsabot tali sa ginikanan ug anak nagpadayon nga hinungdanon.
Photo Courtesy: VOCAL MEDIA
