Magkahiusa pag-usab sila LeBron James, Stephen Curry ug Kevin Durant sa usa ka makusog nga lineup sa NBA All-Star Game, sumala sa opisyal nga roster nga gipahibalo niadtong Martes.
Gipaila sa liga ang bag-ong porma sa All-Star Game karong tuiga, diin bahinon ang mga manlalaro sa tulo ka teams—duha nga gilangkoban sa mga Amerikanong players ug usa ka team nga naglangkob sa mga international stars. Ang mga team magduwa sa round-robin mini-tournament, ug ang duha ka pinakataas og puntos ang mag-atubang sa final game.
Pangunahan sa tulo ka haligi sa Team USA nga nakaangkon og gold medal sa 2024 Paris Olympics—James, Curry ug Durant—ang team nga gitawag og “USA Stripes.” Kauban nila si Jaylen Brown sa Boston Celtics, Jalen Brunson sa New York Knicks, Kawhi Leonard sa Los Angeles Clippers, Donovan Mitchell sa Cleveland Cavaliers, ug Norman Powell sa Miami Heat.
Ang ikaduhang US team, nga ginganlan og “USA Stars,” naglangkob kang Cade Cunningham sa Detroit Pistons, Anthony Edwards sa Minnesota Timberwolves, Chet Holmgren sa Oklahoma City Thunder, Devin Booker sa Phoenix Suns, Tyrese Maxey sa Philadelphia 76ers, ug Jalen Duren sa Detroit.
Sa international side, gipangunahan ang “World Team” sa Canadian star ug reigning NBA Most Valuable Player nga si Shai Gilgeous-Alexander sa Oklahoma City, kauban si Luka Dončić sa Los Angeles Lakers, Victor Wembanyama sa San Antonio Spurs, ug Nikola Jokić sa Denver Nuggets.
Pagahimoon ang NBA All-Star Game sa Los Angeles sa Pebrero 15.
Photo Courtesy: Yardbarker
