Mokabat na sa kapin 34 ka tawo ang namatay tungod sa kusog nga winter storm nga miigo sa daghang bahin sa Estados Unidos, samtang milyon-milyon ang nag-atubang sa grabeng katugnaw ug padayon nga pagbaha sa nieve ug yelo.
Gipagawas ang cold weather alerts sa sentral ug sidlakang bahin sa nasud tungod sa polar vortex nga nagdala og rekord nga kabugnaw sa pipila ka estado. Sa ubang rehiyon, gilauman nga dili mosaka sa above freezing ang temperatura hangtod sa sayong bahin sa Pebrero, ilabi na sa Midwest.
Sumala sa mga taho, ang mga namatay natala sa daghang estado lakip ang New York, Tennessee, Texas, Louisiana, Pennsylvania, Massachusetts, ug Kansas, uban sa mga kamatayon tungod sa hypothermia ug mga aksidente nga may kalabutan sa grabe nga panahon.
Gawas sa mga namatay, kapin 539,000 ka residente sa 11 ka estado ang nawad-an og kuryente tungod sa storm, nga nagpalisod pa sa kahimtangan sa mga komunidad nga apektado sa grabeng katugnaw.
Photo Courtesy: PNA
