Sama sa ka-importante sa kahimtang sa mental health sa mga kababaihan, importante sab ang mental health sa kalalakihan, kini ang gihisgutan atol sa programang Department in Focus sa lokal nga panggamhanan sa dakbayan.
Sumala pa ni CJ Karl Salcedo-Focal Person sa CSWD Mental Helpline nga subay sa mga pagtuon ug mismong naandan o kultura sa nasud, mas mahisgutan ang mental health status sa kababainhan tungod dali ra sab silang makapagawas sa ilang gibati ug gihuna-huna.
Kung itandi sa kalalakin-an dili sila daling makapakita sa ilang emosyon tungod na sab sa kabalaka nga mahusganan sa uban ug sa stigma nga ang mga lalaki kinahanglang permi lang mubarog ug dili magpakita og kahuyang.
Tungod niini, giawhag sab ang tanan nga kung adunay mga kaila, higala o kapamilya nga kalalakin-an angay sab silang kumustahon o check man lang labi na kung makitaan sa mga sinyales sa pag-decline sa ilahang mental health.
Matod pa ni Salcedo nga daghang pamaagi aron sila matabangan sama nalang sa paghatag og suporta ug permi nga paggiya. Empatiya kung pagsabot sa ilang kahimtang ug dili lang taman sa simpatiya ang ilahang gikinahanglan.
Gipunting ni Salcedo nga nagatanyag og libre nga psychosocial services ang ilahang buhatan pinaagi sa pagtawag sa CSWD 24/7 mental helpline sa numero nga 0970-039-2709 o 0975-608-7522.
Aduna sab face to face psychological first aid ug counselling services, kinahanglan lang nga muduol sa CSWD. Ka-juander ayaw og buhi.
Photo courtesy: Cagayan de Oro City Information Office
