Giplanohan sa lokal nga pagamhanan sa syudad sa Cagayan de Oro nga ilang hatagan sa oportunidad ang mga pribado nga negosyante nga gusto makig-alayon sa gobyerno diha sa kamerkadohan sa Cogon Public Market.
Matod ni John Actub ang tigpamaba ni Mayor Klarex Uy nga proposal pa lamang kini nga usbon o i-renovate ang merkado kauban ang mga pribadong negosyante nga gusto makigtimbayayong sa gobyerno alang sa kalambuan.
Nagtoo sab ang tigpamaba nga kon ang magdumala pribado mas motoo pa ang mga nangabang na vendor kompara sa gobyerno base sa ilang obserbasyon.
Lambigit niini nga balita, mipagawas og sentemiyento ang pipila ka mga mamalitay sa Cogon public market sa dihang gipulsohan sa Juander Radyo Cagayan de Oro nga pag awhag sa mga vendor nga manghinlo sa ilahang mga tugkaran kay sila dapat ang nag-una nga responsable sa kahinlo sa Merkado.
Matod pa sa mga nahinabi sa atong news team nga kinahanglan kada human sa pagpamaligya sa mga vendor manghinlo usab sila aron mamentina ang kahinlo sa ilahang mga stall.
Dugang pa angay usab magpahigayon og regular nga pagpanghinlo ang kadumalahan sa Cogon Market aron nga masiguro ang kahinlo sa Merkado.
