Giaprubahan sa House Committee on Higher and Technical Education ang House Bill No. 2778 o ang Student Internship Allowance Act. Kini nagtumong sa paghatag og kausa nga Php10,000 nga allowance sa mga estudyante nga nakahuman sa ilang gikinahanglan nga internship, practicum, o on-the-job training (OJT) sa mga kolehiyo ug mga technical-vocational nga institusyon.
Tumong niini nga balaodnon nga maiban-ibanan ang gasto sa mga estudyante sa plete, pagkaon, ug uban pang panginahanglan samtang nagbansay sa trabaho. Ang allowance dili mahimong ipasa ngadto sa uban, ug walay bisan unsang kuhaon nga kantidad. Sakop niini ang mga estudyante nga naka-enroll sa mga tunghaan nga giila sa CHED ug mga institusyon nga akreditado sa TESDA.
Gawas niini, giaprubahan usab sa panel ang House Bill No. 4699 nga nagmando sa TESDA sa paghimo ug pagpatuman og mga programa sa technical-vocational education, training, ug livelihood sa mga rehabilitadong drug dependents. Ubos niini nga balaudnon, gimandoan usab ang DOLE nga mohatag og insentibo sa mga kompanya nga mo-hire sa mga benepisyaryo sa programa. Tumong niini nga mahatagan sila og kahibalo ug kahanas nga magamit sa trabaho aron makasugod og malungtarong panginabuhian.
Photo courtesy: House of Representatives of the Philippines
