Mainitong giabi-abi ni Cebu City Mayor Nestor Archival ang mga delegado sa ASEAN kagahapong adlawa, Enero 28 alang sa gipahigayon nga Heritage Walk nga nagtumong sa pagpasundayag sa mabulukong kultura ug turismo sa Dakbayan sa Sugbo.
Lakip sa mga mahinungdanong dapit nga gibisita sa maong grupo mao ang Magellan’s Cross, diin gisugat sa usa ka reenactment performance diin nagpakita sa pagbunyag.
Giduaw usab sa mga delegado ang makasaysayong Basilica Minore del Sto. Niño, ang Fort San Pedro, ug ang Art Museum nga nailhang mga nag-unang destinasyon sa mga turista sa syudad.
Dugang niini, mipaambit si Mayor Archival sa iyang obserbasyon mahitungod sa kasamtangang kahimtang sa industriya sa turismo nga matod pa niya nakasinati og paghinay kon itandi sa ubang kanasoran sa Asia.
Kini usab gi-suportahan ni Cebu Provincial Gov. Pamela Baricuatro ang paghagba sa turismo sa Sugbo
Base sa nasuta nga datus, mihagba ang turismo sa syudad diin ubos ang occupancy rate sa mga hotel ug nagpabiling hagit ang taas nga presyo sa pletehan sa eroplano paingon sa Sugbo kun itandi sa ubang nasud.
Bisan pa niini, malaumon ang Mayor nga pinaagi sa mga diskusyon sa ASEAN Tourism Forum, mahatagan og dinaliang pagtagad ang mga global ug regional nga isyu aron hingpit nga molambo pag-usab ang turismo dili lang sa dakbayan kundili sa tibuok lalawigan sa Sugbo.
