Usa ka 280 centimeters ang gitas-on o kapin o kulang 9 feet nga King Cobra o mas naila sa tawag nga banakon ang napatay sa mga residente sa Brgy. Poblacion area sa lungsod sa T’Boli, South Cotabato.
Base sa Video ni Val Jaleco residente sa nasampit nga lungsod, giingong nisulod matod pa sa ilang balay ang maong bitin hinungdan nga nangayo kini og tabang ug gitabangan sa mga residente og patay ang Bitin.
Giklaro usab niini nga walay nasamdan o napaakan sa maong Bitin apan kinahanglan kining patyon aron dili maka-among sa uban.
Kahibaluan nga kini ang ikaduhang King Cobra nga gipatay sa probinsiya sa South Cotabato karong buwana diin niadtong Sabado, Enero 17, 2026, laing King Cobra o Banakon usab ang napatay sa lungsod sa Polomolok.
Giawhag ang tanang mga katawhan nga magpabiling alerto ug i-report gilayon sa mga awtoridad kung dunay makitang bitin aron kini maaksiyonan og malikayan ang posibleng dili maayong panghitabo.
Photo Courtesy: Val Jaleco
