Luwas na sa kahimtang ang usa ka Public School Teacher human kini gipusil sa wala mailang suspetsado sa may Purok 5, Barangay Sambulawan, Tukuran, Zamboanga del Sur, adlawng Sabado, Enero 17, 2026.
Ang biktima nagpangidaron ug 38-anyos lalaki ug gikataho nga nag referee pa nianang bag-ong gabie sa pagkatigayon sa insidente sa Midsalip, Zamboanga del Sur.
Apan sa diha nga mipauli na ang biktima paingon sa ilang pinuy-anan agi sa dalan sa Sominot iyang namatikdan ang nagsunod nga motorsiklo nga misulay pa ug pahunong sa biktima.
Bisan sa gihimong pagpahunong sa suspetsado ngadto sa biktima apan wala kini nagmalampuson hinungdan nga gipusil na lang sa suspetsado ang walang paa sa biktima.
Human sa hitabo, daling misibat ang suspetsado paingon sa Midsalip, Zamboanga del Sur, samtang dali usab nga gidala ang biktima ngadto sa Zamboanga del Sur Medical Center, Dao, Pagadian City nga karon anaa na sa luwas nga kahimtang.
Na-recover sa kapulisan sa dapit nahitabuan ang duha kabhang sa kalibre 45 nga pistola nga gituohang maoy gigamit sa suspetsado.
Naglusad dayon ang Tukuran MPS ug dragnet operation sa pakigkoordinar sa haduol nga Municipal Police Station alang sa posibleng pagkasikop sa suspetsado.
Sa nagpadayong imbestigasyon sa kapulisan, gituohan nga tulis ang motibo sa suspetsado kalabut sa maong hitabo.
Photo Courtesy:PD ZSPPO, PRO 9
