Naabtan nang wala’y kinabuhi ang usa ka pasahero sa motorbanca human nahitabo ang usa ka disgrasya sa kadagatang bahin duol sa Brgy. Day-asan, Surigao City, alas 7 sa buntag, Enero 18,2026, adlaw’ng Dominggo.
Sumala sa City Disaster Risk Reduction and Management Office – Surigao City, bandang alas 7:00 sa buntag nahitabo ang insidente, samtang alas 8:06 sa buntag na kini opisyal nga nareport sa mga otoridad.
Ang motorbanca nga ubos lamang sa 3 gross tons, kinsa gisakyan sa mga pasahero nga gipangunahan ni Mario Larong, nilarga gikan sa Brgy. Talisay, Surigao City padulong sa mainland sa syudad. Apan sa ilang paglabay sa katubigan sa Brgy. Day-asan, kalit silang nakasugat og dagkong balod nga maoy hinungdan sa pagka-unlod sa maong sakayang pandagat.
Alas 8:10 sa buntag, gilayon miresponde ang Philippine Coast Guard Station Surigao City, kauban ang Coast Guard Special Operations Group – North Eastern Mindanao ug FPB-151, ug nikasa og search and rescue operation.
Atol sa nagpadayon nga rescue operation, usa sa mga survivor nga si Jun Montederama mipahibalo pinaagi sa tawag sa telepono nga ang mga pasahero naluwas na pinaagi sa tabang sa mga miagi nga motorbanca sa maong lugar. Apan, usa sa mga sakay ang wala pa makit-an niadtong mga higayona.
Tungod niini, gipadayon sa Disaster Response Group ang pagpangita sa na-missing nga indibidwal.
Alas 9:20 sa buntag sa karung adlawa, gipahibalo ni Vincent Angelo Ramiro, kanhing kapitan sa Brgy. Talisay, nga ang na-missing nakit-an na nga walay kinabuhi sakay sa laing motorbanca.
Ang lawas sa biktima gidala sa Nueva Basin sa Brgy. Taft, ug gihatagan og hinanaling tabang sa Philippine Coast Guard atol sa pagdala niini padulong sa Surigao Medical Center. Pag-abot didto, gideklarar na sa attending physician nga si Dr. Rainer Bautista nga Dead on Arrival na ang biktima.
Ang namatay nailhan nga si Nelyn B. Longos, 47 anyos, ug residente sa Buenavista, Agusan del Norte.
Sa kinatibuk-an, 11 ka indibidwal ang naluwas, samtang usa ang namatay sa maong insidente. Samtang ang naunlod nga motorbanca gibira na padulong sa kabaybayonan sa Brgy. Talisay, Surigao City alang sa safekeeping ug posibleng pag-repair.
Padayon ang pahimangno sa mga otoridad sa publiko, ilabi na sa mga mananagat ug pasahero, nga likayan ang pagbiyahe sa dagat kon dili maayo ang panahon, aron malikayan ang susamang trahedya.
