Gisumsoman sa social media sa Sugbu ang mahitungod sa striktong pagpatuman sa dress code sa Basilica Minore del Sto. Niño human sa matod pa mga hulagway ni Senadora Imee Marcos nga nanagkot didto sa sulod nga nagsul-ob og sleeveless nga blouse.
Gikwestyon sa daghang mga netizens nganong gitugotan nga makasulod ang senadora sa basilica nga strikto man nga gipatuman ang dress code.
Nagsugod kini human sa post sa social media diin ang senador nanagkot kinsa nabantayan ug gisaway sa mga netizens tungod sa gisul-ob niini.
Nagsagol ang reaksyon sa mga netizens, diin ang uban sa senador misaway samtang ang uban ngadto sa mga pari sa basilica ang pagsaway.
Tungod niini, mipagawas og advisory si Basilica media liaison Fr. Jules Van Almerez kabahin sa striktong pagsunod sa dress code sa tanang gustong mosulod sa basilica.
Subay sa advisory, nagkanayon kini nga bisan pa man nga adunay uban nga dili mosunod sa dress code, wala kini magpasabot nga sundon usab ang ilang panig-ingnan. Kinahanglan nga magpabiling mapainubsanon ug disiplinado sa kaugalingong pamatasan sulod sa simbahan.
Ang dress code sa simbahan nagdili sa mga sinina sama sa sleeveless tops, spaghetti straps, tube tops, short skirts, shorts, ripped jeans, ug uban pang mga sinina nga dili angay alang sa pagsimba.
