Angol ang usa ka miyembro sa Barangay Peace Keeping Action Team (BPAT), human sa pinakabag-ong insidente sa pagpanglabay og granda sa Purok 3, Barangay Manubuan, Matalam, Cotabato, niadtong nakalabay nga adlaw.
Giila ang biktima nga si Danny Boy Alqueza Villanueva, 36-anyos ug residente sa Barangay Estado sa nahisgutang munisipyo.
Sa taho sa Matalam Municipal Police Station, sakay ang biktima sa dump truck sa LGU dihang pag abot sa lugar nahitaboan, gilabayan kini og granada, hinungdan nga nakaangko kini og samad sa ulo. Samtang dali usab nga gidala sa balay tambalanan ang biktima, alang sa atensyong medikal.
Matod pa, duha ka wala pa mailhing suspek nga sakay sa motorsiklo ang responsable nga daling nisibat sa wala matinong direksyon human sa insidente.
Kahinumduman, kini na ang ikaduhang insidente sa pagpanglabay og granada sa nahisgutang munisipyo, asa unang nahitabo niadtong Enero 1 atol sa pagsugat sa bag-ong tuig, asa 22 ka indibidwal ang naangol.
Sa karon, padayon pa ang gihimong imbestigasyon sa Matalam Municipal Police Station may kalabutan sa naasoy nga panghitabo.
