Giklaro sa Social Security System (SSS) Valencia ang mga hinungdan sa pagkalangay sa pagproseso sa pipila ka claims sa ilang buhatan.
Matod ni SSS Valencia Branch Manager Alan S. Layon, adunay daghang factors nga makaapekto sa kalangan, labi na kon ang usa ka claim nanginahanglan pa og resulta sa field investigation aron masiguro ang hustong pagproseso ug pag-validate sa mga detalye.
“Mas paspas ug hapsay ang proseso kon kompleto ug tukma ang mga requirements nga gipang-submit sa miyembro,” matod pa ni Layon. Gidasig niya ang publiko nga siguruhon ang hustong dokumento sa dili pa mag-file og claim aron malikayan ang dugang kalangan.
Migawas ang pahayag sa Social Security System (SSS) Valencia pagkahuman mitaho sa Juander Radyo Malaybalay si Felipa Cajatol, sa iyang reklamo kabahin sa dugay nga pag-release sa Death Claim. Ang maong reklamo mipukaw sa interes sa publiko ug mitultol sa opisyal nga klaripikasyon gikan sa buhatan sa SSS.
Nanawagan usab ang SSS Valencia sa mga miyembro nga mopahibalo dayon sa buhatan kon adunay naobserbahang pagkalangay, aron mahatagan sila og klarong tubag ug tukmang rason bahin sa kahimtangan sa ilang claim.
Photo Courtesy: SSS VALENCIA CITY
