Gipasabot ni Norayah A. Acas, Provincial Director sa Technical Education and Skills Development Authority (TESDA) sa Lanao del Norte, nga ang kakulang sa kahibalo ug kahanas usa ka dakong hinungdan nganong daghang Pilipino ang mabiyaan sa kalamboan.
Matod pa ni PD Acas, sa kalibutan nga padayon nga nag-usab ug nagkakusog ang kompetisyon, ang usa ka tawo nga walay igong kahibalo ug walay skill walay kasiguruhan sa kaugmaon.
Gidugang pa nga ang kahanas dili lang usa ka bentaha, kondili usa ka haligi nga mahimong sandigan aron makab-ot ang pangandoy sa kinabuhi.
Iyang gi-emphasize nga sa panahon karon, ang walay skill klarong mabiyaan, ilabi na sa pagpangita og trabaho diin taas kaayo ang panginahanglan sa kwalipikado ug andam nga mga trabahante. Dugang pa nga ang kakulang sa kahanas mahimong mopugong sa usa ka tawo nga makalingkawas sa kalisod ug kakabus.
Sumala pa ni Acas, nagpadayon ang TESDA sa paghimo og konkretong mga lakang aron matabangan ang mga Pilipino nga makakuha og angay ug dekalidad nga mga kahanas nga magamit sulod ug gawas sa nasud.
Iyang gihatagan og dakong bili ang papel sa mga Overseas Filipino Workers kun (OFWs), nga nailhan isip usa sa mga lig-on nga haligi sa ekonomiya sa Pilipinas.
Matod niya, mas lig-on ug mas protektado ang usa ka Filipino nga mo-abroad kung siya adunay sakto ug angay nga skill nga magamit sa pagpanarbaho.
Ang kahanas dili lang maghatag og trabaho, kondili maghatag og dignidad, kalig-on, ug paglaum sa kaugmaon.
